Милитсияи тоҷик аз рӯзҳои аввали таъсисёбиаш дар баробари дигар сохторҳои мақомоти ҳифзи ҳуқуқ, худро ҳамчун ниҳоди муҳим ва боэътимод муаррифӣ намуда, бо далерию шуҷоатмандӣ, ҷонфидоию кордонӣ, садоқатмандӣ ба халқу Ватан, оштинопазирӣ бо ҷинояту ҷинояткорӣ, ҷустуҷӯи ҳақиқату адолат миёни ҷомеа соҳиби обрӯю эҳтироми баланд гардидааст.
Хизмати шабонарӯзӣ ва шуҷоату қаҳрамонии кормандону хизматчиёни мақомоти корҳои дохилӣ дар роҳи барқарор намудани сохти конститутсионӣ, устувор гардонидани сулҳу осоиш ва оромии ҷомеа ҳамчун намунаи олии садоқат ба Ватан ва давлату миллат арзёбӣ мегардад.
Татбиқи нақшаҳои созанда, ки ба нафъи халқ ва зиндагии осоиштаи сокинон равона шудаанд аз бисёр ҷиҳат аз фаъолияти пурсамари кормандони милитсия вобаста мебошад. Боварии комил дорем, ки минбаъд низ Шумо аз иҷрои вазифаҳои дар наздатон гузошташуда, бо сарбаландӣ мебароед.
Дар ин асно, санаи 8-уми ноябри соли равон дар толори Қасри фарҳанги ноҳияи Варзоб бо иштироки раиси ноҳияи Варзоб Дамонзода Хусрав Назаралӣ ва сардори шуъбаи Вазорати корҳои дохилӣ дар ноҳияи Варзоб подполковники милитсия Пирзода Муҳриддин Табар тантанаҳои идона бахшида ба Рӯзи кормандони милитсия баргузор гардид.
Дар чорабинии мазкур муовинони раиси ноҳия, роҳбари дастгоҳи раиси ноҳия, роҳбарони ниҳодҳои ҳифзи ҳуқуқ- суд, прокуротура, амният, комиссариати ҳарбӣ, раиси Кумитаи иҷроияи Ҳизби Халқии Демократии Тоҷикистон дар ноҳия, сардорони раёсат, шуъба ва бахшҳои мақомоти иҷроия ва воҳидҳои сохтории он, раисони ҷамоатҳои шаҳрак ва деҳот, собиқадорон ва кормандони шуъбаи Вазорати корҳои дохилӣ дар ноҳия, вакилони халқ, роҳбарони ташкилоту муассисаҳои дар ҳудуди ноҳия фаъолиятдошта, соҳаҳои маориф, фарҳанг ва тандурустӣ, раисони кумитаҳои маҳал, имомхатибони масҷидҳои ҷомеъ ва панҷвақта, фаъолони ноҳия, волонтёрони бахши кор бо ҷавонон ва варзиш, гирандагони стипендияи президентӣ ва раиси ноҳия, роҳбар ва аъзои намояндагии Ташкилоти ҷамъиятии ҷавонон «Созандагони Ватан» иштирок намуданд.
Нахуст, дар чорабинии тантанавӣ раиси ноҳияи Варзоб муҳтарам Дамонзода Хусрав Назаралӣ суханронӣ намуда, таъкид доштанд, ки ҳар сол 10-уми ноябр дар қаламрави кишвар чун Рӯзи таъсисёбии милитсияи тоҷик таҷлил мегардад. Ба ин муносибати нек аз номи Мақомоти иҷроияи ҳокимияти давлатии ноҳияи Варзоб кулли алоқамандони ин мақомоти муҳими давлатӣ ва ҳозиринро бо иди касбӣ самимона табрик гуфта, барояшон тансиҳативу хонаободӣ, пешрафту муваффақият ва дар иҷрои рисолати бошарафу пурифтихорашон комёбиҳо орзу менамоям.
Баъдан, муҳтарам Дамонзода Хусрав Назаралӣ иброз намуданд, ки мусаллам аст, ки рушди давлат ва ҳаёти ҷомеа аз суботу амният ва таъмини оромиву тартиботи ҷамъиятӣ вобастагии калон дорад ва иҷрои ин вазифаи муҳим ба дӯши кормандони мақомоти ҳифзи ҳуқуқ ва сохторҳои низомӣ, алалхусус, мақомоти корҳои дохилӣ вогузор гардидааст.
Ҳамчунин, Дамонзода Хусрав Назаралӣ зикр карданд, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар суханронии худ ба муносибати Рӯзи милитсия қайд намуданд, ки «Давлат ва Ҳукумати мамлакат, дар баробари фароҳам овардани шароити зарурии зиндагӣ ва хизмат барои кормандони мақомоти милитсия, ҳайати шахсии Қӯшунҳои дохилӣ ва таҳкими асосҳои моддиву техникии онҳо, инчунин, хизмати содиқонаи ҳомиёни Ватан ва қонунияту тартиботро ҳамеша қадршиносӣ менамояд».
Дар баробари ин, сардори шуъбаи Вазорати корҳои дохилӣ дар ноҳияи Варзоб подполковники милитсия Пирзода Муҳриддин Табар собиқадорони соҳа ва кормандони мақомоти милитсияро аз номи худ ва роҳбарияти Вазорати корҳои дохилии Ҷумҳурии Тоҷикистон табрик гуфта, барояшон сиҳатию саломатӣ, ваҳдату саодати зиндагӣ ва пешрафту муваффақияти беназири корҳояшонро таманно намуда, зимни баромади худ ибрози андеша намуданд, ки Мақомоти милитсияи тоҷик аз рӯзҳои аввали ба даст овардани Истиқлоли давлатии ҷумҳурӣ сарфи назар аз мушкилоту монеаҳои зиёд, якҷо бо дигар мақомоту сохтори низомӣ аз уҳдаи иҷрои масъулияти басо муҳиму душвор — барқарор кардани сохти конститутсионии давлат, тартиботи ҳуқуқӣ ва волоияти қонун сарбаландона баромад.
Инчунин, Пирзода Муҳриддин Табар қайд намуданд, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар суханронии худ ба муносибати Рӯзи милитсия ёдовар шуданд, ки «Барқарорсозии сулҳу оромӣ, суботи сиёсӣ ва таъмин намудани шароиту муҳити орому осуда барои зиндагии мардум ва корҳои ободониву созандагӣ, ки имрӯз дар кишвар густаришу тавсеа пайдо карда истодааст, натиҷаи саъю талоши ватандӯстона ва матонату садоқати кормандони милитсия, дигар мақомоти ҳифзи ҳуқуқ ва сохторҳои ҳарбии давлати соҳибихтиёри Тоҷикистон мебошад».
Маврид ба зикр аст, ки дар чорабинии тантанавӣ ба як қатор собиқадорон ва кормандони милитсия барои хизматҳои содиқона дар рушди соҳа бо медали ҷашнӣ, аз ҷониби Мақомоти иҷроияи ҳокимияти давлатии ноҳияи Варзоб бо ифтихорномаву сипоснома ва аз ҷониби шуъбаи Вазорати корҳои дохилӣ бо сипоснома қадрдонӣ карда шуданд.
Дар қисмати тантанавии чорабинӣ аз ҷониби ҳунармандони бахши фарҳанги ноҳияи Варзоб барномаи театрикунонидашуда бо ҳузури ситораҳои санъати ҷумҳурӣ, ки хотирмон буд мавриди назари иштирокдорон гардонида шуд.
Орифҷон ОЛИМЗОДА
