Ҳимояи марзу буми Ватан вазифаи муқаддас ва пурифтихори на танҳо хизматчиёни ҳарбӣ, балки ҳар як шахси солимфикр, бообрӯ ва нангу номуси давлатамон мебошад.
Қобили қайд аст, ки имрӯз бо дастгирӣ ва ташаббусҳои бевоситаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тамоми хизматчиёни ҳарбӣ аз ҷумла қисми ҳарбии 3502-и Қӯшунҳои дохилии Вазорати корҳои дохилӣ бо тамоми шароитҳои хизматбарӣ, аз ҷумла маҷлисгоҳ, толори варзишӣ, ошхонаю дигар иншоотҳои маишию хизматӣ таъмин карда шудаанд.
Қайд кардан бо маврид аст, ки имрӯз хизмат дар сафи Қувваҳои Мусаллаҳ назар ба солҳои пешин хело беҳтар шуда, дар мадди назари махсуси Ҳукумати Ҷумҳурии Тоҷикистон таҳти роҳбарии бевоситаи Асосгузори сулҳу ваҳдати миллӣ – Пешвои миллат, Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон қарор дошта, хизматчиёни ҳарбӣ бо сару либос, се вақт хӯроки гарм ва лавозимоти зарурӣ таъмин мебошанд.
Боиси қаноатмандист, ҷавонони ноҳияи Варзоб пеш аз ҳама, дастгирию ғамхориҳои пайвастаи Роҳбари давлатамонро ба хубӣ дарк намуда, сиёсати хирадмандонаю созандаашонро эҳсос менамоянд. Ҳаёти сарбози имрӯза аз ҳама гуна замонҳои қаблӣ ба куллӣ фарқ мекунад. Имрӯз ҷавонони мо дар қисмҳои низомии кишвар танҳо ба хотири ҳимояи марзу бумамон ва пойдории ваҳдату истиқлолияти давлатӣ хизмат мекунанд. Дар он ҷо ҳама чун фарзандони як модаранд. Камбудию норасоие дар ҳаёти сарбозӣ ба чашм намерасад. Ҳамаи шароитҳои моддию маънавӣ барои сарбозон муҳайёст.
Маврид ба зикр аст, ки дар асоси Нақшаи чорабиниҳои муштарак бахшида ба Рӯзи таъсисёбии Қувваҳои Мусаллаҳи Ҷумҳурии Тоҷикистон ҷавонони синни даъватӣ, волонтёрони бахши кор бо ҷавонон ва варзиш, аъзои намояндагии Ташкилоти ҷамъиятии ҷавонон «Созандагони Ватан» ва хонандагони муассисаҳои таълимии ҳудуди ноҳия бо мақсади шиносоӣ бо ҳаёти низомӣ ва таҳкими ҳисси ватандӯстӣ аз қисми ҳарбии 3502-и Раёсати Қӯшунҳои дохилии ВКД ҶТ бо иштироки масъулини Мақомоти иҷроияи ҳокимияти давлатии ноҳияи Варзоб боздид ба амал оварда, шароит ва таъминоти моддию техникии афсарону сарбозони қисми ҳарбии мазкур аз наздик шиносоӣ пайдо намуданд.
Дар ин асно, масъулини бахши кор бо ҷавонон ва варзиш иттилоъ доданд, ки дар ҷараёни вохӯрӣ афсарону сарбозони қисми ҳарбии болозикр ба ҷавонон оид ба вазифаҳои Қувваҳои Мусаллаҳи Ҷумҳурии Тоҷикистон, омодагии ҷисмонӣ ва маънавии низомиён, ҳамчунин муҳимияти ҳифзи марзу буми кишвар маълумотҳои муфассал доданд.
Мақсад аз ташкил ва баргузор намудани чунин чорабиниҳо ин баланд бардоштани ҳисси ватандӯстии ҷавонон ва омода намудани онҳо ба хизмати ҳарбӣ мебошад.
Хотиррасон менамоем, ки ҷавонон бо афсарону сарбозон суҳбати самимӣ анҷом дода, таассуроти нек бардоштанд.
Орифҷон ОЛИМЗОДА
