Санаи 5-уми сентябри соли равон дар толори маҷлисгоҳи Мақомоти иҷроияи ҳокимияти давлатии ноҳияи Варзоб бо иштироки раиси ноҳия муҳтарам Дамонзода Хусрав Назаралӣ қадршиносии кормандони касбу кори гуногун бахшида ба ҷашни 34-солагии Истиқлоли давлатии Ҷумҳурии Тоҷикистон баргузор гардид.Нахуст, раиси ноҳияи Варзоб муҳтарам Дамонзода Хусрав Назаралӣ ҳозиринро бахшида ба ҷашни 34-солагии Истиқлоли давлатӣ табрику муборакбод намуда, ба онҳо бахту саодат, иқболи накӯ, осмони соф ва сулҳу субботи ҳамешагиро таманно намуданд.
Баъдан, Дамонзода Хусрав Назаралӣ қайд намуданд, ки сиву чор сол пеш миллати куҳанбунёд, соҳибфарҳанг ва тамаддунсози тоҷик ба дастоварди бузург ва муқаддас Истиқлолияти давлатӣ ноил гардид, ки ҳоло мову Шумо ин рӯйдоди муборакро бо камоли ифтихору сарфарозӣ ҷашн мегирем.
Дар ин замин, раиси ноҳия зимни суханронии худ ибрози намуданд, ки имрӯз бо ибтикори Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мардуми шарафманду сарбаланди Тоҷикистони азиз бо тамоми ҳастӣ дарк менамоянд, ки истиқлолият муқаддастарин ва азизтарин неъмат, рукни асосии давлати озод, рамзи шарафу номуси ватандорӣ, кафолати хонаи ободу нерӯи таконбахши ҳаёти ҳарӯзаи мо мебошад.
Илова бар ин, Хусрав Дамонзода ёдовар шуданд, ки воқеан, истиқлолият барои мо рамзи олии ватану ватандорӣ, бузургтарин неъмати давлатсозию давлатдории мустақил, кору пайкори пайгиронаи созандагӣ, бо азму талошҳои фидокорона расидан ба истиқлолияти сиёсӣ, иқтисодӣ ва фарҳангиро омӯзонида, меъёрҳои ҷомеаи шаҳрвандиро таҳти роҳбарии Пешвои муаззами миллат муҳтарам Эмомалӣ Раҳмон таҳким бахшид ва дар як вақт ҳаёти озодонаи ҳар фард ва олитарин дараҷаи бахту саодати воқеии миллатро таъмин намуд.
Сипас, раиси ноҳияи Варзоб муҳтарам Дамонзода Хусрав Назаралӣ ба нафароне, ки дар чорабиниҳои ҷамъиятӣ, бунёди иншооти ҷашнӣ ва тараққиёту пешрафти ноҳия ҷиҳати ободонию шукуфоӣ нақши арзанда гузоштаанд, изҳори сипос намуда, ба як қатор кормандони мақомоти иҷроияи ҳокимияти давлатӣ ва сохторҳои таркибии он, намояндагони ҳифзи ҳуқуқ, соҳаҳои тандурустӣ ва маорифу фарҳанг, соҳибкорон, ҳунармандон, собиқадорони меҳнат ва фаъолони ноҳия барои ноил гардидан ба дастовардҳои беҳтарини меҳнатӣ, иштироки пайваста ва саҳми арзанда гузоштан дар раванди корҳои ободонию созандагӣ бахшида ба ҷашни 34-солагии Истиқлоли давлатии Ҷумҳурии Тоҷикистон бо Ифтихорнома ва Сипосномаи Мақомоти иҷроияи ҳокимияти давлатии ноҳияи Варзоб, ки бо қарори раиси ноҳияи Варзоб аз 3-юми сентябри соли 2025, рақами 186 тасдиқ гардидааст, сарфароз гардонида шуданд.
Орифҷон ОЛИМЗОДА
