Санаи 14-уми феврали соли 2025 дар толори Мақомоти иҷроияи ҳокимияти давлатии ноҳияи Варзоб бо иштироки раиси ноҳия Дамонзода Хусрав Назаралӣ, муовини якум ва муовинони раиси ноҳия, роҳбари дастгоҳи раиси ноҳия, раиси Кумитаи иҷроияи ҲХДТ, сардорони раёсат, шуъбаву бахшҳои мақомоти иҷроия ва воҳидҳои сохтории он, раисони ҷамоатҳои шаҳрак ва деҳоти ноҳия, соҳаҳои маорифу тандурустӣ ва фарҳанг, роҳбарони хоҷагиҳои кишоварзӣ, корхонаю ташкилоту муассисаҳо ва намояндагони васоити ахбори омма нишасти матбуотӣ баргузор гардид.
Дар оғоз раиси ноҳияи Варзоб Дамонзода Хусрав Назаралӣ оид ба дастовардҳо ва нақшаҳои оянда ба таври мухтассар ба рӯзноманигорон иттилоъ доданд. Аз ҷумла зимни баромади худ қайд намуданд, ки дар давраи ҳисоботӣ сокинони мамлакатамон бо сарварии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва тадбирҳои ҳамешагии Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ба дастовардҳои арзанда ноил гардида, баҳри татбиқи сиёсати созанда ва амалӣ намудани ҳадафҳои Ҳукумати Ҷумҳурии Тоҷикистон, аз ҷумла татбиқи ҳадафҳои стратегии мамлакат ва баҳри ободии сарзамини аҷдодиамон саъйу талош намуда, ба дастовардҳои шоиста ва назаррас ноил гардиданд. Инчунин, дар рафти баргузории нишасти матбуотӣ ба саволҳои рӯзноманигорон оид ба фаъолияти Мақомоти иҷроияи ҳокимияти давлатии ноҳия, раванди корҳои созандагиву бунёдкорӣ ва нақшаҳо барои солҳои минбаъда пурра посух доданд.
Ҳамзамон, Дамонзода Хусрав Назаралӣ қайд намуданд, ки давоми соли 2024, 72 ҳазору 635 нафар сайёҳон ба ноҳия ташриф оварданд, ки нисбат ба ҳамин давраи соли гузашта 261нафар зиёд мебошад. Инчунин, маврид ба зикр аст, ки аз шумораи болозикр 6 ҳазору 825 нафар сайёҳони хориҷӣ мебошанд.
Ҳамзамон, дар баромад дарҷ гардид, ки дар ноҳия 25 ёдгориҳои таърихӣ мавҷуд мебошад, ки аз он 17 ёдгориҳои бостонӣ 8 ёдгориҳои меъмории дорои аҳамияти ҷумҳуриявӣ ва маҳаллӣ мебошад, ки рӯйхати онҳо дар таҳияи Феҳристи давлатии ёдгориҳои моддии Ҷумҳурии Тоҷикистон ба қайд гирифта шудааст.
Дар баробари ин, раиси ноҳия Дамонзода Хусрав Назаралӣ ба хабарнигорон иттилоъ доданд, ки ҷиҳати дар сатҳи баланд пешвоз гирифтани ҷашни 35-солагии Истиқлоли давлатии Ҷумҳурии Тоҷикистон дар ноҳияи Варзоб таъмиру бунёди 158 иншоот ба нақша гирифта шудааст, ки то имрӯз 70 иншоот ё 76,1 фоиз иншооти гуногуни ҷашнӣ мавриди баҳрабардорӣ қарор дода шуда, корҳои сохтмонӣ дар иншооти дигар идома доранд.
Инчунин, Дамонзода Хусрав Назаралӣ иброз доштанд, ки иҷрои нақшаи даромадҳои буҷети ноҳияи Варзоб давоми соли 2024 бо дарназардошти андози иҷтимоии ғайрибуҷетӣ ба андозаи 106,3 (фоиз) иҷро гардид.
Дар ин раванд, Дамонзода Хусрав Назаралӣ таъкид доштанд, ки нақшаи дарахтшинонӣ дар тирамоҳи соли 2023 ва баҳори соли 2024 шинондани 13450 бех дарахтони гуногун тасдиқ гардид, ки дар натиҷа 17100 бех дарахтон, аз ҷумла 2500 бех мевадиҳанда, 2200 бех ниҳолҳои сояафкан ва 12240 бех ниҳолҳои ороишӣ дар ҳудуди ноҳия шинонида шуд, ки ин 127, 6 % -и нақшаи соли 2024 –ро ташкил медиҳад.
Зимни баргузории нишаст намояндагони васоити ахбори омма иштироки фаъолона намуда, оид ба масъалаҳои мактабу маориф, фарҳанг, тандурустӣ, шуғли аҳолӣ, даъвати ҷавонон ба хизмати ҳарбӣ, таблиғи эҳсоси ватандорӣ дар байни ҷавонон ва ғайра пурсишҳо ба амал оварда, ба саволҳои худ посухҳои мушаххас гирифтанд.
Дар охир раиси ноҳияи Варзоб муҳтарам Дамонзода Хусрав Назаралӣ ҳамаи намояндагони васоити ахбори омма ва иштирокчиёнро барои ширкат намуданашон аз номи Мақомоти иҷроияи ҳокимияти давлатии ноҳияи Варзоб миннатдорӣ баён намуданд.
Ҳамзамон ёдрас менамоем, ки Мақомоти иҷроияи ҳокимияти давлатии ноҳияи Варзоб зери роҳбарии раиси ноҳия Дамонзода Хусрав Назаралӣ дар доираи сиёсати бунёдкоронаю созандаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дастуру супоришҳои Ҳукумати Ҷумҳурии Тоҷикистон фаъолиятро роҳандозӣ намуда, дар ин давра аксари соҳаҳои иқтисодию иҷтимоӣ ва нишондиҳандаҳои асосии иқтисодии ноҳия таъмин гардид.
Орифҷон ОЛИМЗОДА
