30 август Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо мақсади иштирок дар Рӯзи дониш ва дарси сулҳ ба Донишгоҳи байналмилалии сайёҳӣ ва соҳибкории Тоҷикистон ташриф оварданд.
Нахуст, дар Донишгоҳ Сарвари давлат муҳтарам Эмомалӣ Раҳмон Маркази рушди малакаҳо, касбомӯзӣ ва хизматрасонӣ дар соҳаи сайёҳӣ ва хобгоҳу ошхонаи донишҷӯёни донишгоҳро мавриди истифода қарор доданд.
Бинои 8-ошёнаи таълимии маркази рушди малакаҳо дорои 92 синфхона ва 24 ҳуҷраи корӣ мебошад, ки метавонад дар як вақт то 3200 донишҷӯро ба таълиму тарбия фаро бигирад.
Таъсиси маркази таълимӣ барои таъмини идоракунии самтҳои мухталифи донишгоҳ, ҳамгироии самтҳои гуногуни фаъолият ва муосирсозии раванди таълим нақши асосӣ дорад.
Дар Маркази рушди малакаҳо, касбомӯзӣ ва хизматрасонӣ дар соҳаи сайёҳӣ дар марҳилаи аввал 4500 нафар ба таҳсил фаро гирифта мешаванд.
Дар ин ҷо дар маҷмуъ аз рӯи 14 ихтисос донишҷуён ба омӯзиш фаро гирифта мешаванд. Ҳар як синфхона бо назардошти талаботи касби интихобнамудаи донишҷӯ бо таҷҳизот ва аёниятҳои мувофиқи хониш таъмин карда шудааст.
Марказ дар доираи татбиқи Барномаи давлатии касбомӯзии шаҳрвандони Ҷумҳурии Тоҷикистон барои солҳои 2021-2025 дар ҳамкорӣ бо Бонки Осиёии Рушд баҳри соҳибкасб намудани шаҳрвандон бунёд гардидааст.
Бинои 5-ошёнаи хобгоҳ, ки имрӯз ифтитоҳ ёфт, бо 92 ҳуҷра барои 368 донишҷӯ пешбинӣ шудааст. Ҳар як ҳуҷра мутобиқ ба талаботи зарурӣ ҷиҳозонида шуда, дар он барои будубоши донишҷӯён шароити зарурӣ фароҳам гардидааст.
Дар бинои 3-ошёнаи таълимӣ, ки қисме аз маркази рушд мебошад, толори барҳавои варзишӣ ва ҳавзи шиноварӣ ҷойгир карда шудааст, ки бо истифода аз ин шароит 5 намуди мусобиқаи варзишӣ ба роҳ монда мешавад.
Ошхонаи нави донишгоҳ дар як вақт ба 336 донишҷӯ хизмат мерасонад.
Дар толори ошхона вохӯрии Роҳбари давлат бо 80 донишҷӯи ятим баргузор гардид.
Пешвои миллат муҳтарам Эмомалӣ Раҳмон ҷавононро ба омӯзиши илмҳои муосир, забонҳои хориҷӣ ва технологияҳои иттилоотӣ ҳидоят намуданд.
Бояд гуфт, ки дастгирии ятимон зери таваҷҷуҳи пайвастаи Ҳукумати кишвар қарор дошта, фароҳам кардани шароит ҳавасмандии донишҷӯёнро барои омӯзиши илмҳои муосир дучанд мегардонад.
Дар шароити имрӯзаи ҷаҳони муосир фароҳам овардани имконияти зарурӣ барои илму донишомӯзшии ҷавонон муҳимтарин василаи омода кардани кадрҳои баландихтисоси хештаншинос ба ҳисоб меравад.
Сарвари давлат муҳтарам Эмомалӣ Раҳмон дар ин рӯз баъди шиносоӣ бо лоиҳаҳои як қатор иншоот барои бунёди бинои таълимии 12-ошёна дар ҳудуди донишгоҳ ва бинои таълимии 7-ошёнаи Донишкадаи байналмилалии Хуҷанди назди Донишгоҳи байналмилалии сайёҳӣ ва соҳибкории Тоҷикистон асос гузоштанд.
Бинои иловагии Донишгоҳи байналмилалии сайёҳӣ ва соҳибкории Тоҷикистон аз 72 синфхонаи барҳаво иборат хоҳад буд ва барои 1500 донишҷӯ пешбинӣ шудааст.
Пешвои миллат муҳтарам Эмомалӣ Раҳмон ба масъулин супориш доданд, ки иншоотро бо назардошти талаботи муосири таълим, меъмории миллӣ ва босифат бунёд намоянд.
Ҳамзамон, дар ин рӯз коргоҳи таълимию истеҳсолии дузандагии Донишгоҳи байналмилалии сайёҳӣ ва соҳибкории Тоҷикистон мавриди истифода қарор гирифт.
Дар ин ҷо барои 200 кас мутобиқ ба талабот шароит фароҳам оварда шудааст, ки донишҷӯён дар баробари омӯзиш ба кори музднок ҷалб карда мешаванд.
Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон пас аз ифтитоҳи бинову иншооти нав дар Донишгоҳи байналмилалии сайёҳӣ ва соҳибкории Тоҷикистон дар ҷамъомад ба муносибати рӯзи дониш бо аҳли маорифи кишвар мулоқот ва суханронӣ намуданд.
Сарвари давлат муҳтарам Эмомалӣ Раҳмон вохӯрии имрӯзаро фурсати хубе барои таҳлилу баррасии вазъи соҳаи ҳаётан муҳим – маориф арзёбӣ намуданд.
Таъкид гардид, ки бо шарофати истиқлолу озодӣ, сулҳу суботи комил ва ваҳдати миллӣ дар Тоҷикистони азизи мо барои илму донишомӯзии насли наврас ва ҷавонон тамоми шароиту имкониятҳои зарурӣ муҳайё карда шудааст.
Ба таъкиди Роҳбари давлат муҳтарам Эмомалӣ Раҳмон тамоми пешрафту дастовардҳои кишвар, аз ҷумла дар соҳаи маориф, ҳаёти шоиставу осоиштаи мардум, пеш аз ҳама, ба пойдории сулҳу оромӣ ва суботи сиёсӣ вобаста мебошад.
Пешвои миллат муҳтарам Эмомалӣ Раҳмон сулҳро сари баланду қомати болои мардум, бахту саодати ҳар як хонадон ва асоси пешрафти давлату миллат, аз ҷумла рушди соҳаи маориф арзёбӣ намуданд.
Сарвари давлат муҳтарам Эмомалӣ Раҳмон пешниҳоди ташаббуси навбатии Тоҷикистон доир ба “Даҳсолаи таҳкими сулҳ ба хотири наслҳои оянда”-ро идомаи мантиқии талошҳои сулҳхоҳонаи кишвари мо дар арсаи байналмилалӣ номиданд.
Дар робита ба раванди ислоҳоти соҳаи маориф таъкид гардид, ки дар 34 соли соҳибистиқлолӣ ба ин соҳа аз ҳисоби буҷети давлатӣ 67,4 миллиард сомонӣ ва аз ҳисоби лоиҳаҳои сармоягузории давлатӣ 6,2 миллиард сомонӣ, яъне дар маҷмуъ, 73,6 миллиард сомонӣ маблағгузорӣ гардидааст. Имрӯз дар соҳаи маориф 11 лоиҳа ба маблағи 4 миллиарду 300 миллион сомонӣ татбиқ шуда истодааст.
Таъкид гардид, ки тайи даврони соҳибистиқлолӣ музди меҳнати кормандони соҳа давра ба давра беш аз 20 баробар зиёд карда шуд.
Роҳбари давлат аз ҳамкории соҳибкорони бонангу номус ва шахсони саховатпеша бо Ҳукумати кишвар дар ин самт ёдовар шуданд. Хотирнишон гардид, ки тайи даврони соҳибистиқлолӣ аз ҷониби соҳибкорони ватандӯсти кишвар ва шахсони саховатпеша ба маблағи 1 миллиарду 700 миллион сомонӣ 1435 муассисаи соҳаи маориф бо 231 ҳазор ҷойи нишаст сохта, ба истифода дода шудааст.
Зикр карда шуд, ки соли 2025 дар қаламрави кишвар аз ҳисоби ҳамаи сарчашмаҳои маблағгузорӣ сохтмони 309 муассисаи таълимӣ ва бинову синфхонаҳои иловагӣ дар назди муассисаҳои таълимӣ бо беш аз 94 ҳазор ҷойи нишаст идома дошта, то охири сол зиёда аз 200 бинои навбунёд бо тамоми шароити зарурӣ ба истифода дода мешавад.
Сарвари давлат муҳтарам Эмомалӣ Раҳмон ба таваҷҷуҳи хосаи Ҳукумати кишвар ба вазъи муассисаҳои томактабӣ ишора намуда, диққати роҳбарони вилоятҳо ва шаҳру ноҳияҳо, вазорату идораҳои марбута ва волидонро ба густариши раванди бунёди муассисаҳои томактабӣ ва таъсиси шаклҳои алтернативии фарогирӣ бо ин зинаи таълим ҷалб намуданд.
Барои рушди таҳсилоти миёнаи умумӣ, ки яке аз зинаҳои муҳимми соҳаи маориф маҳсуб меёбад, таҳия ва қабули стандарти нави давлатии таҳсилоти миёнаи умумӣ амри зарурӣ шумурда шуд.
Роҳбари давлат иброз доштанд, ки қабули стандарти нави давлатӣ бояд ба беҳбуди воқеии сифати таҳсилот, болоравии қобилияти рақобати хатмкунандагон ва ташаккули низоми таълими устувор ва ҷавобгӯй ба ниёзҳои замон мусоидат намояд.
Сарвари давлат таъмин намудани муассисаҳои таълимиро бо кадрҳои омӯзгорӣ яке аз масъалаҳои асосӣ дар соҳаи маориф номида, сохторҳои марбутаро вазифадор намуданд, ки дар муддати як сол масъалаи норасоии кадрҳои омӯзгориро пурра бартараф намоянд.
Зимни суханронӣ дар рӯзи дониш ва дарси сулҳ Президенти кишвар муҳтарам Эмомалӣ Раҳмон, ҳамчунин, масъалаҳои вобаста ба зинаи таҳсилоти ибтидоӣ ва миёнаи касбӣ, ҳарчи бештар ба касбомӯзӣ фаро гирифтани шаҳрвандон, таҳия ва чопи китобҳои тахассусиро таҳлилу баррасӣ намуда, барои ислоҳи камбудиҳои ҷойдошта дастуру супоришҳо доданд.
Таҳсилоти олии касбӣ мавзуъи дигари суҳбат буд, ки вобаста ба рушди он Сарвари давлат бо таҳлилҳои мушаххас андешаронӣ намуданд.
Вобаста ба ифтитоҳи Маркази рушди малакаҳо, касбомӯзӣ ва хизматрасонӣ дар назди Донишгоҳи байналмилалии сайёҳӣ ва соҳибкории Тоҷикистон ба роҳбарияти он супориш дода шуд, ки бо оғози фаъолияти ин Маркази муҳим дар ҳамкорӣ бо вазорату идораҳои марбута баҳри ҷалби ҳарчи бештари сокинони кишвар барои касбомӯзӣ чораҷӯйӣ карда, донишҷӯёнро низ дар баробари гирифтани ихтисос ба омӯзиши касбҳои алоҳида сафарбар карда шаванд.
Ҳамзамон бо ин, Пешвои миллат муҳтарам Эмомалӣ Раҳмон бо мақсади татбиқи Стратегияи миллии рушди маориф барои давраи то соли 2030 ва Стратегияи рушди Донишгоҳи байналмилалии сайёҳӣ ва соҳибкорӣ барои давраи то соли 2040 пешниҳод намуданд, ки дар заминаи донишкадаи сайёҳии донишгоҳ Академияи сайёҳии Донишгоҳи байналмилалии сайёҳӣ ва соҳибкории Тоҷикистон таъсис дода шавад.
Бо қаноатмандӣ зикр гардид, ки ҳоло дар Донишгоҳи байналмилалии сайёҳӣ ва соҳибкории Тоҷикистон беш аз 20 ҳазор донишҷӯ аз гӯшаҳои гуногуни кишвар ва ҳам 6 давлати хориҷ таҳсили илм менамоянд.
Дар идомаи суханронӣ Роҳбари давлат муҳтарам Эмомалӣ Раҳмон ба масъулини соҳаи маориф супориш доданд, ки барои омода кардани омӯзгорони соҳаи табиатшиносӣ, дақиқ ва риёзӣ, ки яке аз масъалаҳои муҳим дар низоми маорифи кишвар маҳсуб меёбад, чораҳои таъхирнопазир андешанд.
Президенти кишвар муҳтарам Эмомалӣ Раҳмон дар бораи мақому манзалати омӯзгор андешаронӣ намуда, таҳия ва қабули Қонуни Ҷумҳурии Тоҷикистон “Дар бораи мақоми омӯзгор”-ро нишонаи олии эҳтирому қадршиносии омӯзгор аз тарафи Ҳукумати Ҷумҳурии Тоҷикистон номиданд.
Дар фароварди сухан Роҳбари давлат иброз доштанд, ки қарзи фарзандӣ ва вазифаи шаҳрвандии мову шумост, ки ба хотири пешрафту ободии диёри баҳиштосои худ, хусусан, дар доираи омодагӣ ба ҷашни бузурги миллиамон — 35-солагии истиқлоли давлатӣ пайваста заҳмат кашем ва обрӯи Тоҷикистони маҳбубамонро дар арсаи байналмилалӣ боз ҳам баланд бардорем.
Сарвари давлат муҳтарам Эмомалӣ Раҳмон ба мардуми шарафманди кишвар, аз ҷумла ҷавонону наврасони ватандӯсти Тоҷикистон муроҷиат карда, таъкид намуданд, ки мо бояд бо шукронаи соҳибватаниву соҳибдавлатӣ ҳамеша сарҷамъу муттаҳид бошем, бо ҳисси баланди миллӣ тамоми тавону неруи худро барои ободии Ватанамон ва пешрафти давлати соҳибихтиёрамон равона созем.
