Санаи 20-уми январи соли равон дар толори маҷлисгоҳи Мақомоти иҷроияи ҳокимияти давлатии ноҳияи Варзоб маҷлиси Кумитаи иҷроияи Ҳизби Халқии Демократии Тоҷикистон таҳти Раёсати раиси Кумитаи иҷроия Қосимзода Маҳтоб Пир, узви Кумитаи иҷроия, раиси ноҳияи Варзоб Дамонзода Хусрав Назаралӣ ва мудири шуъбаи таблиғот ва ташвиқоти Дастгоҳи Кумитаи Иҷроияи Марказии ҲХДТ Ширинбекзода Садриддин баргузор гардид.Маврид ба зикр аст, ки дар рафти маҷлис узви Кумитаи иҷроия, раиси ноҳияи Варзоб муҳтарам Дамонзода Хусрав Назаралӣ суханронӣ намуда, иброз доштанд, ки ҳар як аъзои ҳизбро зарур аст, ки кору фаъолияти худро дар асоси дастуру ҳидоятҳои Раиси муаззами Ҳизби Халқии Демократии Тоҷикистон, Пешвои маҳбуби миллат муҳтарам Эмомалӣ Раҳмон дуруст ба роҳ монда, нерӯи худро барои ояндаи дурахшони кишвари маҳбуб равона намоянд ва содиқонаву софдилона меҳнати пурсамару созанда дошта бошанд.
Илова бар ин, узви Кумитаи иҷроия Хусрав Дамонзода қайд намуданд, ки ба ҳамагон маълум аст, санаи 16-уми декабри соли 2025 дар бинои парлумони кишвар Паёми навбатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» ба таври мустақим ироа гардид. Тамоми шаҳрвандони кишвар бахусус сокинони ноҳияи Варзоб бо як самимияти хосса ва дилгармии беандоза дастаҷамъона Паёмро шуниданд ва эҳсос карданд, ки он бевосита роҳнамо ва барномаи инкишофу пешравии ҳамаи соҳаҳои ҳаёти рӯзмарра пазируфта шуд.
Дар ин замина, раиси ноҳия зикр намуданд, ки Президенти мамлакат муҳтарам Эмомалӣ Раҳмон дар Паёми худ ба Маҷлиси Олӣ чунин иброз намуда буданд: «Азбаски чор сол пеш доир ба 35-солагии истиқлол қарор қабул карда будем, пешниҳод менамоям, ки соли 2026 соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ ба ифтихори ин ҷашни муқаддас ва бузурги миллӣ эълон карда шавад». Ин иқдоми Сарвари давлат рамзи густариши корҳои бунёдкорию ободонӣ дар тамоми қаламрави Тоҷикистон мебошад.
Дар фарҷом ба як қатор роҳбарони ташкилотҳои ибтидоии ҳизбӣ ва фаъолони ҲХДТ барои фаъолияти назаррас ва баланд бардоштани нуфуз ва мавқеъи ҳизб дар ҷомеъа бо сипосномаи Кумитаи иҷроия қадршиносӣ гардидаанд.
Орифҷон ОЛИМЗОДА
