Бо мақсади сазовор пешвоз гирифтани ҷашни 35-солагии Истиқлоли давлатии Ҷумҳурии Тоҷикистон Озмуни ҷумҳуриявии «Тоҷикистон – ватани азизи ман» таҳти сарпарастии бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои дарёфти истеъдодҳои нави соҳаи санъат, баланд бардоштани мақому маҳорати касбӣ, тақвият бахшидан ба касбияти ҳунари иҷрокунандагӣ ва эҷоди мусиқии нав, инчунин, таълифи ашъори баландғояи ватандӯстона, дарёфти беҳтарин намунаҳои оҳанг ва сурудҳои тараннумгари дастовардҳои замони Истиқлолияти давлатӣ баргузор гардид.Қобили қайд аст, ки барои баланд бардоштани савияи дониш ва малакаю маҳорати аҳолии мамлакат имрӯзҳо дар саросари кишвар як қатор озмунҳои ҷумҳуриявӣ ба роҳ монда шудааст, ки яке аз онҳо ин Озмуни ҷумҳуриявии «Тоҷикистон – Ватани азизи ман» ба шумор меравад.
Дар озмун ҷавонону наврасон шеъру суруд ва оҳангҳои нав, асарҳои мусиқии композиторони ватанию ҷаҳонӣ, намунаҳои мусиқии анъанавӣ, академӣ ва муосири тоҷикро, ки ба талаботи низомнома ва шартҳои озмун ҷавобгӯянд, пешниҳод менамоянд.
Гуфта мешавад, ки ҳар як номинатсия дорои талаботи махсуси касбӣ буда, дар вақти иҷро таълифи асари мусиқӣ, шеър, суруд ва оҳанг ба инобат гирифта мешаванд.
Ғолибони озмун бо шоҳҷоиза, диплом ва мукофотҳои пулӣ сарфароз гардонида мешаванд. Ғолибони озмун инчунин ҳуқуқи иштирок дар чорабиниҳои сатҳи ҷумҳуриявӣ ва байналмилалиро пайдо мекунанд.
Қобили қайд аст, ки бо ибтикор ва ташаббусҳои хирадмандонаи Асосгузори сулҳу ваҳдати миллӣ –Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баргузории як қатор озмунҳои ҷумҳуриявӣ дар болоравии сатҳи маърифату маънавиёти мардум мусоидат менамояд.
Ҳамзамон ёдрас менамоем, ки маҳз, чунин сиёсати хирадмандонаи Пешвои муаззами миллат муҳтарам Эмомалӣ Раҳмон ва таваҷҷуҳи Ҳукумати мамлакат ба насли ҷавон аст, ки дар замони Истиқлоли давлатӣ дар ҷаҳонбинӣ ва назару андешаи ҷавонон таҳаввулоти куллӣ ба вуҷуд омада, имрӯз гуфтору рафтор, одобу ахлоқ ва муносибати онҳо ба зиндагӣ бамаротиб беҳтар гардидааст ва ҷавонони мо ҳоло дар корҳои давлативу ҷамъиятӣ саҳми сазовор гузошта истодаанд. Зеро дар ҳалли масъалаҳои ҳаётан муҳим, аз ҷумла таҳкими пояҳои давлатдорӣ, рушди муназзаму устувори ҳамаи соҳаҳои иқтисоди миллӣ, бунёди роҳҳо ва нақбу пулҳо, нерӯгоҳҳои хурду бузург, сохтмони иншооти иҷтимоӣ, умуман дар раванди пешрафту ободонии кишварамон нақш ва саҳми ҷавонон басо арзишманд мебошад.
Боиси ифтихори сокинони ноҳияи Варзоб аст, ки дар даври ҷумҳуриявӣ аз ноҳия 10-нафар иштирок намуданд, ки аз инҳо 4-нафар сазовори ҷойҳои ифтихори гардиданд.
Бо ҳамин тартиб:
— НОМИНАТСИЯИ БАСТАКОРӢ: синни 18–35 сола (жанри мусиқии эстрадӣ) ғолиби ҷойи дуюм Назаров Некрӯз;
— НОМИНАТСИЯИ КОМПОЗИТОРӢ: синни 18–40 сола (жанри академӣ) ғолиби ҷойи сеюм Раҳматуллозода Сафарбек;
— НОМИНАТСИЯИ ДИЗАЙН: синни 18 – 35 сола (жанри батика, мӯд ва зебосозии либос) ғолиби ҷойи сеюм Ганҷинаи Нусратулло;
— НОМИНАТСИЯИ САРОЯНДАГӢ: синни 12 – 17 сола (жанри сарояндаи эстрадӣ) ҷойи сеюм Расулов Хушдил.
Илова бар ин, Саидова Мавҷигул, Бобоев Юсуф ва Толибов Сулаймон ҳамчун иштирокчии фаъол дар даври ҷумҳуриявӣ бо Диплом ноил гардиданд, ки ин туҳфаи арзандаест дар арафаи ҷашнгирии Рӯзи Конститутсияи Ҷумҳурии Тоҷикистон.
Дар ин замина, роҳбарият ва кормандони Мақомоти иҷроияи ҳокимияти давлатии ноҳияи Варзоб иштирокчиёни озмуни мазкурро барои ноил шудан ба ин дастоварди назаррас самимона муборакбод намуда, дар корҳои минбаъдаашон барору комёбӣ таманно менамоянд.
