Дар ноҳияи Варзоб бахшида ба 31-солагии қабули Конститутсияи Ҷумҳурии Тоҷикистон чорабинии идона баргузор гардид.
Дар ин асно, санаи 5-уми ноябри соли равон дар толори Қасри фарҳанги ноҳияи Варзоб таҳти Раёсати раиси ноҳияи Варзоб Дамонзода Хусрав Назаралӣ, судяи Суди конститутсионии Ҷумҳурии Тоҷикистон, номзади илмҳои ҳуқуқшиносӣ, дотсент Ҷамшедзода Ҷамшед Назаршо ва раиси суди ноҳияи Варзоб, номзади илмҳои ҳуқуқшиносӣ Абдуллозода Ҷамолиддин Абдулло тантанаҳои идона бахшида ба 31-солагии қабули Конститутсияи Ҷумҳурии Тоҷикистон баргузор гардид, ки дар рафти чорабинии мазкур роҳбарони ниҳодҳои ҳифзи ҳуқуқ, муовини якум ва муовинони раиси ноҳия, роҳбари дастгоҳи раиси ноҳия, раис ва кормандони Кумитаи иҷроияи Ҳизби Халқии Демократии Тоҷикистон, сардорони раёсат, шуъба ва бахшҳои мақомоти иҷроия ва воҳидҳои сохтории он, раисони ҷамоатҳои шаҳрак ва деҳот, вакилони халқ, соҳаҳои маорифу фарҳанг ва тандурустӣ, волонтёрони бахши кор бо ҷавонон ва варзиш, аъзои намояндагии Ташкилоти ҷамъиятии ҷавонон «Созандагони Ватан», собиқадорони ҳизбҳо, ҷангу меҳнат, гирандагони стипендияи президентиву раиси ноҳия ва дигар шахсони даъватӣ иштирок намуданд.
Қайд кардан бо маврид аст, ки толори Қасри фарҳанги ноҳия бо шиору овезаҳо баҳри Конститутсия – иродаи давлатдории миллӣ ифода мекарданд овезон гардида, дастовардҳои ҳунармандони ҷамоатҳои шаҳрак ва деҳот, варзишгарон, аҳли фарҳанг, маорифу тандурустӣ ва дигар ташкилоту муассисаҳои ҳудуди ноҳия дар маърази намоиш гузошта шуда буд.
Дар ин замина, меҳмонон аз намоиши китбҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дастовардҳои ноҳия дидан намуданд.
Нахуст дар чорабинии тантанавӣ раиси ноҳияи Варзоб муҳтарам Дамонзода Хусрав Назаралӣ бо сухани табрикотӣ фарорасии Рӯзи Конститутсияи Ҷумҳурии Тоҷикистонро, ки соҳибихтиёрӣ, истиқлолият ва тамомияти арзии кишварамонро таъмин намуда, кафили баробарҳуқуқии шахс, озодӣ, дӯстии тамоми халқу миллатҳо мебошад, ба кулли сокинони шарафманди ноҳия ва ҳозиринро табрику муборакбод гуфта, ба ҳамагон хотири ҷамъ, саломатии комил, хонаободӣ ва дастоварду муваффақиятҳои бепоён таманно намуданд.
Баъдан, муҳтарам Дамонзода Хусрав Назаралӣ иброз намуданд, ки яке аз муҳимтарин нишонаҳои давлати соҳибистиқлоли мо Конститутсия мебошад, ки Тоҷикистони азиз расо 31 сол муқаддам ин санади олии ҳуқуқиро қабул кард. Конститутсияи мамлакат ҳуқуқу озодиҳои ҳамаи қишрҳои ҷомеаро фарогир буда, аз беҳтарин қонунҳои асосии дунё эътироф мешавад, ки боиси ифтихор ва сарбаландии ҳар сокини кишвар аст.
Дар баробари ин, Дамонзода Хусрав Назаралӣ ибрози андеша намуданд, ки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тавонистанд, ки Тоҷикистонро дар саросари олам бо Конститутсия рукнҳои созандаи мардуми заҳматпешаю меҳмоннавоз, бо табиати зебою афсонавӣ, обҳои зулол, кӯҳҳои осмонбӯс ва сиёсати сулҳҷӯёнаашон маълуму машҳур гардонанд. Ба шарофати истиқлолият ва тибқи Конститутсия мо соҳиби Парчам, Нишон ва Суруди миллӣ гардидем.
Дар идома, судяи Суди конститутсионии Ҷумҳурии Тоҷикистон Ҷамшедзода Ҷамшед Назаршо дар мавзуъи «Нақши Конститутсия дар ташаккул ва таҳкими давлатдории муосири Тоҷикистон» баромад намуда, хотиррасон намуданд, ки Конститутсия аз ҷумлаи дастовардҳои бузурги мардуми Тоҷикистон буда, пойдевори ҳуқуқии давлати наву соҳибистиқлоли тоҷикон, шакли ифодаи ҳуқуқии ормонҳои давлатдории миллӣ, ҳимояи ҳадафҳо ва манфиатҳои миллӣ, осори таърихӣ ва фарҳангӣ мебошад. Инчунин, Конститутсия — давлати Тоҷикистонро чун давлати иҷтимоӣ эълон намудааст, ки дар он барои ҳар як инсон шароити зиндагии арзанда ва инкишофи озодона таъмин карда мешавад.
Сипас, раиси суди ноҳияи Варзоб, номзади илмҳои ҳуқуқшиносӣ Абдуллозода Ҷамолиддин Абдулло дар мавзуъи «Конститутсия — кафили ҳифзи ҳуқуқу озодиҳои инсон ва шаҳрванд» баромад намуданд. Аз он ҷумла зимни баромад таъкид карданд, ки мо 31-солагии қабули Конститутсияи кишварро дар айёме таҷлил менамоем, ки Ҷумҳурии Тоҷикистон ҷойгоҳи худро дар арсаҳои минтақавӣ ва ҷаҳонӣ таҳким бахшида, муносибату робитаҳои дуҷониба ва гуногунҷонибаро бо кишварҳои ҷаҳон тақвият мебахшад, мавқеи хешро дар ҳалли масоили минтақавӣ ва байналмилалӣ устувортар кардааст. Дар ин замина, Конститутсияи Тоҷикистон дар роҳи пешбурди сиёсати дохилӣ ва хориҷӣ, татбиқи барномаҳои некуаҳволии халқ, иҷрои нақшаҳои бунёдкорӣ дар бахшҳои гуногун, таъмини саодати мардум ва амнияту осоиши кишвар ба сифати роҳнамо хидмат мекунад ва хоҳад кард.
Ҳамчунин, дар чорабинии тантанавӣ ба хонандагони муассисаҳои таълимӣ, ки дар озмуни ноҳиявии «Беҳтарин донандаи Конститутсия» ҷойҳои намоёнро сазовор гардиданд, аз ҷониби Мақомоти иҷроияи ҳокимияти давлатии ноҳияи Варзоб бо Диплом ва мукофотҳои пулӣ қадрдонӣ карда шуданд.
Дар қисмати тантанавии чорабинӣ аз ҷониби ҳунармандони бахши фарҳанги ноҳия барномаи театрикунонидашуда, бо ҳузури ситораҳои санъати ҷумҳурӣ, ки хотирмон буд мавриди назари иштирокдорон гардонида шуд.
Орифҷон ОЛИМЗОДА
