Дар ноҳияи Варзоб озмуни ноҳиявӣ «Беҳтарин донандаи Конститутсия» баргузор гардид
Имрӯз бо қаноатмандӣ метавон гуфт, ки ин санади сарнавиштсози таърихӣ манфиатҳои олии миллат ва давлати соҳибистиқлоламонро инъикос намуда, Тоҷикистонро ба ҷаҳони мутамаддин ҳамчун давлати соҳибистиқлол, демократӣ, ҳуқуқбунёд ва дунявӣ муаррифӣ кард ва ба омили муҳимтарини кафолати устувори ҳаёти сиёсии ҷомеа мубаддал гардид.
Конститутсия таъмини истиқлоли миллӣ ва якпорчагии кишварро кафолат дода, халқи Тоҷикистонро сарчашмаи ягонаи ҳокимияти давлатӣ эътироф намудааст.
Дар ин маврид, тибқи Нақшаи чорабиниҳои Мақомоти иҷроияи ҳокимияти давлатии ноҳияи Варзоб санаи 3-юми ноябри соли равон дар толори мақомоти иҷроия бахшида ба 31-солагии қабули Конститутсияи Ҷумҳурии Тоҷикистон озмуни ноҳиявӣ байни кормандони ташкилоту муассисаҳо ва омӯзгорону хонандагони муассисаҳои таълимии ноҳия таҳти унвони «Конститутсия баёнгари маданият ва ҷаҳонбинии пешрафти ҳуқуқии халқи тоҷик» баргузор гардид, ки дар рафти он муовинони раиси ноҳияи Варзоб Абдуллозода Марҳабо ва Ҳусейнзода Сироҷиддин Бобо, намояндаи шуъбаи маориф Сайфиддин Ҳусейнов ва мудири бахши робита бо ҷомеаи дастгоҳи раиси ноҳия Мусоева Махфират иштирок намуданд.
Сараввал, Кумитаи тадорукотӣ иштирокчиёни озмунро бахшида ба 31-солагии қабули Конститутсияи Ҷумҳурии Тоҷикистон табрику таҳният намуда, баъдан иброз доштанд, ки Конститутсияи мамлакат ҳамчун заминаи ҳуқуқии иқтисодӣ ҷомеаи моро муайян намуда, рушду инкишофи устувории онро кафолат медиҳад. ҳамзамон Конститутсияи Тоҷикистон унсурҳои ҷомеаи шаҳрвандиро муқаррар карда, гуногуншаклии моликият, баробарии онҳоро эътироф мекунад. Ин бесабаб нест, зеро ки асоси иқтисоди ҷомеаи шаҳрвандиро гуногуншаклии моликият ташкил медиҳад.
Баъдан, аз ҷониби аъзоёни ҳакамони озмун иброз гардид, ки ба ҳамагон маълум аст, ки Конститутсияи Тоҷикистони соҳибистиқлол дар шароити ҳассоси таърихӣ ва даргириҳои шадиди сиёсӣ қабул гардид ва муҳимтарин нуктаи он давлати соҳибихтиёр, демократӣ, ҳуқуқбунёд, дунявӣ, ягона ва иҷтимоӣ эълон шудани давлати тоҷикон аст, ки аз қонунҳои баландпояи ҷаҳон маҳсуб меёбад.
Маврид ба зикр аст, ки баргузор намудани чунин озмунҳо миёни шаҳрвандон барои баланд бардоштани завқи китобхонӣ, азхуд намудани донишҳои ҳуқуқӣ, дуруст дарк намудани Конститутсия ва риояи он, санҷидани донишу малакаи худ, пайдо намудани робитаи зич бо дигарон ва мубодилаи таҷриба мусоидат менамояд.
Ҳамчунин, қобили қайд аст, ки донишҳои ҳуқуқии иштирокдорони озмун аз рӯйи донистани Конститутсияи Ҷумҳурии Тоҷикистон ва тафсири моддаҳои он муайян карда шуд.
Тазаккур бояд дод, ки пас аз ҷамъбасти озмуни болозикр ғолибон бо диплом ва туҳфаҳои хотиравии Кумитаи тадорукотӣ қадрдонӣ карда мешаванд.
Орифҷон ОЛИМЗОДА
