Маврид ба зикр аст, ки қувваҳои эҳтиётӣ ё худ захираҳои сафарбарӣ дар сурати эҳтимолияти таҳдиди хатар ба давлат, барои тақвият бахшидани ҳайати Қувваҳои Мусаллаҳи Ҷумҳурии Тоҷикистон, сохторҳои қудратӣ ва мақомоти ҳифзи ҳуқуқи мамлакат нақши калон бозида, дар самти баланд бардоштани иқтидори мудофиавии кишвар саҳми арзанда мегузорад.
Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон ба мардуми Тоҷикистон такроран таъкид намуданд, ки «Мо бояд барои ҳимояи сулҳу оромии ба қимати бисёр гарон бадастовардаамон, суботи сиёсӣ, ваҳдати миллӣ ва амнияти давлату халқамон омода бошем. Зеро ҳимояи амнияти давлат ва ҳифзи оромии ҷомеа барои мо вазифаи муқаддастарин, муҳимтарин ва афзалиятноктарин буда, мо ин корро бо кадом қимате, ки бошад, анҷом медиҳем».
Дар ин маврид, санаи 14-уми ноябри соли равон дар варзишгоҳи марказии ноҳияи Варзоб бо иштироки муовини сардори Ситоди Генералии Қувваҳои Мусаллаҳи Ҷумҳурии Тоҷикистон генерал-майёр Одиназода Мусо Неъмат ва сардори Ситоди мудофиаи ҳудудии №5, раиси ноҳияи Варзоб Дамонзода Хусрав Назаралӣ машқи навбатии таълимӣ баргузор гардид, ки дар он роҳбарони мақомоти ҳифзи ҳуқуқи ноҳия, муовини якум ва муовинони раиси ноҳия, роҳбари дастгоҳи раиси ноҳия, роҳбарон ва кормандони ташкилоту муассисаҳо, раисони ҷамоатҳои шаҳраку деҳот, хизматчиёни ҳарбӣ, афсарону сарбозони эҳтиётӣ, аъзоёни ташкилоти ҷамъиятии «Сипарони Ватан», ҷавонони ватандӯсту хештаншинос ва дигар шахсони мутасаддӣ ширкат варзиданд.
Мақсад аз баргузории чорабинии мазкур ин санҷиши омодабошии ҷангӣ, сафарбарӣ ва мудофиаи ҳудудӣ, сайқал додани таҷрибаи ҳайати шахсии иштироккунандагон, ҳамоҳангии сохторҳои низомӣ дар ҳолати ба вуқуъ омадани хатарҳои эҳтимолӣ, санҷиши дурусти амалиёти тактикӣ, вусъат додани қувва ва воситаҳои минтақаи мудофиаи ҳудудӣ, баланд бардоштани омодагии руҳиву равонӣ ва қобилияти ҷангиву ҷисмонӣ мебошад.
Сараввал, Одиназода Мусо Неъмат, Дамонзода Хусрав Назаралӣ ва дигар шахсон аз сафҳои омодашуда, оид ба иҷрои вазифаву уҳдадориҳои ҷангӣ дидан намуда, сипас зимни суханронӣ доир ба ҳадаф ва зарурияти машғулиятҳои омодагии сафарбарӣ ва ҷамъомади мудофиаи ҳудудӣ изҳори андеша намуданд.
Аз ҷумла зикр карданд, ки чорабинии мазкур дар асоси дастуру супоришҳои Асосгузори сулҳу ваҳдати миллӣ — Пешвои миллат, Президенти кишвар, Сарфармондеҳи Қувваҳои Мусаллаҳи Ҷумҳурии Тоҷикистон генерали артиш муҳтарам Эмомалӣ Раҳмон тибқи нақшаи чорабиниҳои Вазорати мудофиаи Ҷумҳурии Тоҷикистон барои ба амал баровардани тадбирҳои мудофиаи ҳудудии Ҷумҳурии Тоҷикистон, ҳифзи истиқлолият, тамомияти арзӣ ва сохти конститутсионии Ҷумҳурии Тоҷикистон, нигоҳдории реҷаи вазъияти ҳарбӣ, амалӣ мегардад.
Инчунин, зимни суханронӣ дарҷ гардид, ки ба ҳимояи Ватан ва марзу буми он омода будани на танҳо ҷавонони синни даъватӣ, балки ҳар ҷавонмарди бонангу номуси кишвар нишонаи руҳияи баланди ватандӯстӣ ва масъулияти шаҳрвандии ҳар яки мову шумост.
Баъдан таъкид карданд, ки кӯшишҳои аввалини таъсиси Артиши миллӣ аз ҷониби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз рӯзҳои аввали интихоб гардиданашон ба вазифаи Раиси Шӯрои Олии мамлакат ба миён омада, ҷиҳати амалӣ намудани тамоми тадбирҳои судманди вобаста ба таъмини ҳифз ва волоияти қонун ва дастгирии ҳамаҷонибаи афсарону аскарони содиқи ватан саҳми беназир гузоштаанд.
Илова бар ин, хотиррасон намуданд, ки маҳз мактаби бузурги давлатдории Пешвои муаззами миллат, Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон ҷиҳати таъсис, ташаккул ва рушди ин ниҳоди давлатӣ – Артиши миллӣ шароити мусоиду мувофиқ фароҳам овард ва ин тадбир барои таъмини ҳифзи дастовардҳои Истиқлоли давлатии Тоҷикистон ва нигоҳдошти боэътимоди сарҳади давлат солҳои тулонӣ хизмат хоҳад намуд.
Дар охир муовини сардори Ситоди Генералии Қувваҳои Мусаллаҳи Ҷумҳурии Тоҷикистон генерал-майёр Одиназода Мусо Неъмат барои дар сатҳи баланди ташкилӣ омода намудани чорабинӣ ба раиси ноҳия ва дигар масъулон изҳори сипос намуда, минатдории Ситоди Генералии Қувваҳои Мусаллаҳи Ҷумҳурии Тоҷикистонро баён намуданд. Маврид ба зикр аст, ки дар чорабинии болозикр иштирокчиён 106% -ро ташкил медод.
Мақомоти иҷроияи ҳокимияти давлатии ноҳияи Варзоб таҳти роҳбарии раиси ноҳия Дамонзода Хусрав Назаралӣ зери сиёсати сулҳҷӯёнаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор гирифта, баҳри ҳимояи марзу буми кишварамон ҳамеша омода мебошад.
Орифҷон ОЛИМЗОДА
